Jølster Jazzklubb er ein liten, levande jazzklubb i Sunnfjord – ein musikalsk møteplass for dei med øyre. Me lagar konsertopplevingar i bygda gjennom året, og samlar folk rundt musikk, fellesskap og gode kveldar på tvers av generasjonar.
Gjennom året set me opp konsertar i ulike format – frå intime klubbkveldar til større arrangement. Me ønskjer å presentere jazz og improvisasjonsmusikk som femner vidt: noko lokalt, noko regionalt, noko nasjonalt – og av og til internasjonalt. Målet er alltid det same: musikkopplevingar av høg kvalitet, på ein måte som kjennest nær og ekte.
Jazz på Jølst er festivalen vår – og den største møteplassen me lagar i løpet av året. Ei hausthelg fyller me Jølster med musikk, folk og stemning, og inviterer til konsertar og opplevingar på ulike arenaer i bygda.
Festivalen har vorte ein årleg tradisjon, bygd opp steg for steg av frivillig innsats, samarbeid og eit publikum som kjem att. Her får du både dei nære konsertaugneblikka og den store festivalkjensla – med alt frå varme, vare uttrykk til meir energiske kveldar som løftar taket.
Me er stolte av Jazz på Jølst, og takksame for alle som gjer det mogleg: artistar, publikum, frivillige, støttespelarar og samarbeidspartnarar. Det er nettopp dette som er kjernen i klubben vår – å skape kultur i lag, og halde jazzmusikken levande i Jølster.
Jølster Jazzklubb blei stifta 19. mai 2010, av ei lita gruppe jazzinteresserte som ville at Jølstringane skulle få meir å oppleve, og bli betre kjend med jazz som musikkform. Det handla om å skape noko lokalt, noko ein kunne vere stolt av, og ein plass å møtast.
Allereie frå starten blei det lagt ned mykje frivillig innsats, og festivalen voks fram som klubben sitt hovudprosjekt. Sidan den gong har me bygd stein på stein – med konsertar, dugnad, samarbeid og eit publikum som kjem att år etter år.
Klubben blir driven av frivillige, med eit engasjert styre i ryggen. Me er ein gjeng som bryr oss om musikk og bygda vår, og som legg ned timar på timar for å få konsertane til å skje, frå planlegging og booking til rigg, billettar og vertskap.
Styret:
Hallvar Helgheim — leiar
Bård Støfringsdal — styremedlem
Arne Per Huus — styremedlem
Gerd Sunde Førde — styremedlem
Tor Martin Leknes — styremedlem
Tor Ivar Flatjord — varamedlem
Olin Steinsvik — varamedlem
Ole Langvik-Hansen — varamedlem
Å vere medlem i Jølster Jazzklubb er ein enkel måte å støtte det me driv med. Medlemskap gir deg:
— rabatterte billettar på arrangement
— røysterett på årsmøtet og moglegheit til å påverke retninga vidare
— viktigast av alt: du er med på å halde oppe eit lokalt kulturtilbod
Medlemskap kostar 350 kr for vaksne og 100 kr for barn/unge under 25 år. Medlemsskapet kan kjøpast på arrangement, eller via billettløysinga vår TicketCo når det er aktuelt. Om du har spørsmål, er det berre å ta kontakt.